موقع quizlet

بسم الله الرحمن الرحيم

السلام عليكم و رحمه الله و بركاته

موضوع اليوم إن شاء الله راح يكون عن موقع مفيد جداُ للمعلمين و المعلمات و أولياء الأمور و الطلبة

 

أولا طريقة التسجيل :

1- التسجيل أما عن طريق قوقل أو تسجيل عادي .

 

2- نعبي البيانات و نضغط على تسجيل .

3- نختار أن نبي نكمل بالعرض الي ببلاش .

 4- و بجذي نكون سجلنا و السهم الأحمر عشان نسوي ست دراسي نكتب في الكلمات و تعاريفها ، السهم الأخضر نسوي لنا صف عشان الطلبه يقدرون يشوفون الكلمات و التعاريف .

5- إذا ضغطنا عالسهم الأحمر راح تتبطل هالضفحه الي من خلالها نكتب الكلمات و التعاريف و طبعا نقدر نحدد اللغة سواء للكلمه أو التعريف  .

6- إذا ضغطنا عالسهم الأخضر راح تتبطل هالصفحه .

المميزاته :

1- بطاقات فيها التعريف يقراها البرنامج و بظهرها الكلمة ( المصطلح العلمي ) .

2-كتابه المصطلح العلمي مثل الصورة الموقع يختار تعريف يكتبه و يحط بعض الحروف لمساعدة الطلبة .

3-

4- عمل اختبارات و للمعلم حريه اختيار نوعية الأسئلة .

5- و أخيرا لعبتين .

 

و أي سؤال عن الموقع كتبوا بالتعليق و يارب الكل يستفيد إن شاء الله ^_^.

موقع teachers pay teachers

بسم الله رحمن الرحيم

اليوم راح أتكلم عن موقع مفيد جدا للمعلمين و أسمه Teahers pay Teachers

و هذا أهو رابط الموقع https://www.teacherspayteachers.com/

مميزات الموقع :
1- أوراق عمل .
2- مصورات .
3- شخصيات تناسب بعض الدروس .
4- ألعاب و ألغاز .
5- خلفيات و أغلفه للملفات و فواصل إلخ .
6- لمن نحمل الملفات الصور تنزل ملونه و أبيض و أسود ( هالشي بيفيدنا بعمل أوراق العمل الخاصه فينا ) .

طريقه التسجيل كالتالي :

1- نختار الانضمام المجاني

 

2- نختار الباقة الي تعجبنا .



3- نعبي البيانات .

 

 

و بهالخطوات البسيطه نكون سجلنا بالموقع .

 

 

 

* طرق البحث :

 

1- نختار الجزء المظلل لتحميل الملفات المجانية .

 

 

2- راح تطلع لنا ملفات وايد مجانيه بكل المواد و حق كل المراحل .

 

 

3- نقدر نحدد المواد الي نبيها و المراحل من خلال هذي التقسيمة على جانب الموقع .

 

 

أتمنى يعجبكم الموقع و أتمنى الاستفادة للجميع .

 

 

 



هدايا للطالبات

بسم الله الرحمن الرحيم

اليوم إن شاء الله راح أعرض أفكار لتكريم الطالبات و طبعا كل وحده تقدر تضيف و تعدل بالافكار بالي اناسبها ^_^ بسم الله نبدي :

1- الفكره الاولى : الأفكار الي راح أعرضها الحين كلها بالإيطارات أو البراويز و هالشي نقدر نتفنن في :
           أ. نكتب داخل البرواز عبارات الشكر أما طباعةً بالكمبيوتر او عن طريق خط اليد أو لأنهم بنات نقجر نكتبه بالزري .
         ب.ممكن نحط صوره للطالبه داخل البرواز مع عباره الشكر .
         ج. ممكن بالتعاون مع وليه الأمر نحط صور مختلفه لمراحل مختلفه للطالبه بالبراويز المقسمه مع عباره الشكر ^_^ .

2-الفكره الثانيه : طبعا البنات يحبون يشوفون نفسهم بالمرايه ( المنظره ) فحلو أنج تشترين منظره و تكتبين دار مدارها عباره الشكر للطالبه عشان كل ماتشوف نفسها تتذكرج و تتذكر الماده ^_^ ...و  طبعا الكتابه ممكن تكون على المنظره نفسها او على إيطار المنظره إذا أمكن .

3-الفكره الثالثه : صناديق المجوهرات ( music box )  في صناديق خاصه حق البنوتات يقدرون يحطون فيها اغراضهم الخاصه و اكسسواراتهم والأفكار الخاصه في كالتالي :                                            
           أ. الصناديق مثل ماتشوفون بالصور لمن ينفتح في جهه فاضيه من الداخل و مرات يكون في منظره ممكن بهالجهه تكتبين عباره الشكره للطالبه .
         ب. الفكره الثانيه مشابهه للأولى بس الكتابه يا داخل او بره العلبه و ممكن تحطين داخل الصندوق هدايا و اكسسوارات للطالبه و أتوقع هالشي حيل بفرحهم ان شاء الله
         ج. في علب تكون عباره اساسا عن ادرج فتقدرين بكل درج تحطين عبارة للطالبه كنوع من الشكر و التشجيع ^_^ .
         د. ممكن إذا مو حابه تكتبين على الصندوق نفسه تحطين أظرف صغيره داخلها عبارات الشكر .

 

4-الفكره الرابعه : الافكار الي راح أعرضها الحين كلها تتعلق بالحقائب بجميع أنواعها و لج حريه الأختيار تصلح حق :                                                              
1-حقيبة الظهر .                                             
2-حقيبة اليد بأنواعها .                                   
3-الحقيبة الكروس .                                     
4-المقالم .

         أ. كتابة (طباعة)  عباره الشكر على المساحات الفاضية بالحقيبة أو بظهر الحقيبة .                                
       ب. وضع شهادة التقدير العادية داخل الحقيبة مع بعض الهدايا .
       ج. تطريز أسم الطالبة و الصف مع أسم المعلمة على الحقيبة و وضع الشهادة داخل الحقيبة .
        د. وضع بعض المذكرات و الملخصات كمكافئه للطالبة داخل الحقيبة مع شهادة تقدير .
         

 

 

                        
هذي بعض الأفكار أقدمها لكم و يارب تحوز على اعجابكم ^_^ و سامحوني عالقصور ، والي يبي أتكلم عن موضوع معين يكتبلي بالكومنت أو يدزلي رساله على الإيميل بالمواضيع الي حابين أتكلم عنها

 

 

فكرة الأقنعة

بسم الله الرحمن الرحيم

 

اليوم إن شاء الله راح أعرض عليكم فكرة ساعدتني في إدارة الصف و هي فكرة الأقنعة : طبعا الي درسوا إبتدائي خصوصا المراحل الأولى بلاحظون إن أي شي تطلبونه من الطلبة و يخلصون منه على طول معلمتي انتهيت أو أبله خصلت ... إلخ ، و الصف بصير إزعاج فعشان نتلافى هالشي يتني فكرة الأقنعة ، الفكرة كالتالي كل طالبه ببداية الحصه يكون عندها قناع فمثلا لمن أطالب منهم يفتحون الكتاب الصفحة الفلانية أول ماتخلص ماتقولي خلصت لا تلبس القناع كدليل إنها خلصت فجذي راح أعرف منو الي فتحت و منو لا و أتابع الطالبات الي مو عارفين شسون ، هالفكرة وايد ريحتني و النتايج كانت حيل حلوه و الطالبات حبوها .

 

 

 

روح المعلم !

بسم الله الرحمن الرحيم

هذا هو المعلم الحقيقي .

 

تنظيم السبورة

بسم الله الرحمن الرحيم

راح أعرض عليكم طرقتي بتنظيم السبوره و أقترح عليكم بعض الأفكار و الطرق الأخرى .

 هذي كانت سبورتي بالكورس الأول من بداية تعييني لكن حسيتها دفشة و مو مستغله كل مكان فيها فقررت أغيرها الكورس الي ورا ، فقسمتها كالتالي :

جهة اليمين ( الكلمات الجديدة - الأهداف - و فوق حاطه طيور أستخدمهم إذا كان عندي مخططات أو خرائط ذهنيه و إذا ما عندي أخليهم كديكور حق السبورة )

 

بالنص (فوق : الوحدة - الفصل - العنوان / تحت : مساحه فاضيه حق المخطاطات الخرائط و الصور حسب حاجة الدرس / بنص بس قريب من جهة اليسار حق أجوبة مراجعة الدرس )

جهة اليسار ( أقصى اليسار متابعة المجموعات أو الطالبات المتميزات أو المعاقبات كتنبيه لهم )

 

((تقدرون تشوفون السبورة بحسابي بالأنستجرام ))

هذي كانت طريقتي و مرات ممكن أغير أشياء بسيطة حسب الدرس بس هالطريقه الي كنت أعتمدها بكل حصه و كنت أخلي كل مره طالبة تجهزها بالتسلسل لأن يستمتعون بهالشي و كنوع من التعاون ، طبعا السبورة شي مهم بالنسبة لي و كل ما كانت مرتبه و منظمة كل ما أنا و طالباتي ارتحنا فلو حبيت أعيد شرح معلومة راح أعرف وين ألقاها ، ولاحظه حتى الطالبات حيل استانسوا الكورس الثاني على قولتهم ( أبله أنتي مكشخة السبورة ) .

 

نصيحه : حاولي قبل بداية الكورس تقعدين مع نفسج ترتبين أفكارج ترسمين السبورة بورقه و تخططين وين تبين تكتبين كل شي عشان ترتاحين و تريحين الطلبة ، و شوفي حسب المرحلة الي تدرسينها شنو الشخصية الي بتستخدمينها هالكورس و شنو الرموز و العلامات الي تبين تحطينها بالسبورة ، مثلا بدال لاتعبين صوتج إذا صار إزعاج حطي علامه مثلا ويه زعلان و قعدي بكرسيج راح ينتبهون الطلبة و يسكتون بعض عن تجربة ، أو مثلا معلومه مهمه تحطين لها إشاره و تكتبينها و بهالطريقه وايد راح ترتاحين .

 

 

 

 

معلمه بعمر ال 100 !!

بسم الله الرحمن الرحيم

امرأة عظيمة بحبها لوظيفتها بصراحة مو عارفه شقول عنها غير هذا هو فعلا الحب الحقيقي للعمل أتركم مع الفيديوات

 

 

 

أتمنى  من كل معلم و معلمه  يقعدون بينهم وبين نفسهم و يفكرون شوي بالنعم الي أهم فيها ، الصحة و العافية الي تساعدهم إنهم يقدمون أفضل ماعندهم ، لا تنسون أنتو الي بتربون الأجيال أنتو الي بتساعدون الطلبة يسلكون الطريق الصح مو كل أولياء الأمور يشجعون عيالهم بس أنتو بتقدرون تشجعون و تابعون و صدقوني عمرهم الطلبة ماراح ينسونكم ، الأمر كله يحتاج بس شوية تطولون بالكم و صدقون النتايج بتسركم إن شاء الله ، بس حبوا الي تسوونه و تأكدوا أنكم تمتلكون أروع و أفضل مهنه بالعالم ^_^ .

 

موقع Quizlet : تعاريف الصف الثاني الإبتدائي (علوم)

بسم الله الرحمن الرحيم

 

 

موقع وايد حلو و مفيد للطلبة و المعلمين و حتى أولياء الأمور ، يكتب في المعلم كل تعاريف المنهج و البرنامج راح أسويهم على شكل أختبارات و بطاقات و مسابقات و يقدر المعلم من خلاله أن يراقب مستوى الطلبة و وين نقاط ضعفهم ، و مفيد حق جميع المراحل و المواد الدراسية ،


هذا الرابط أنا يمعت في كل تعاريف العلوم للصف الثاني الإبتدائي ( مناهج الكويت ) .

https://quizlet.com/join/FbPZ9G7mK

 

أتمنى ينال على إعجابكم .

 

قوانين الفصل

السلام عليكم ورحمه الله و بركاته

 

 

شلون أحدد علاقتي مع طلبتي ؟؟

شلون أخليهم يحترموني ؟

شلون أخليهم يحبوني ؟

شلون .. شلون ... شلون ؟؟ إلخ .

 

هالأسئلة وغيرها من الأسئلة ممكن تتراود في ذهن الكثير من المعلمين ، وممكن تسبب لهم توتر و ضيقة خصوصا في أيام تدريسهم الأولى ، لكن نصيحتي لهم لا تتوترون ولا تضيقون خلقكم ، قبل الدوام قعدوا مع نفسكم سألو نفسكم ، أنتو شنو تبون من الطلبة شنو نوع العلاقة الي حابين تأسسونها معاهم ؟ معرفتكم لذاتكم أهي الأساس لأن لو أنتو ما عرفتوا شنو تبون منهم شلون تتوقعون منهم يعرفون أنتو شنو تبون !!

 



  والحين عقب ما قعدتوا مع نفسكم أخذو ورقه و قلم و سجلوا كل الأشياء الي ما تبونها و الي تبونها بالصف بس ديروبالكم تكتبونها للطلبة بصيغة نهي مثلا ( لا ترمي الأوراق على الأرض ) بدالها كتبوا ( أحرص على نظافة المكان ) أو ( أنا أرمي الأوراق في سلة المهملات ) لان العقل ما راح يشوف كلمه (لا)  فراح يترجمها ( أرمي الأوراق على الأرض ) ، شغله ثانية حاولوا لمن تسجلون القوانين تربطونها بإشارات أو علامات بحيث تذكرون الطلبة فيها من غير لا تعبون صوتكم مثلا ( أنا أرفع يدي لأتحدث أو لأجيب ) فلمن تصير في إجابات جماعية ذكروهم بالقاعدة بإنكم ترفعون إيدكم بهدوء و نطروهم لين يسكتون ، و نصيحه حرصوا دايما على تطبيق القواعد لأن إذا مره طبقتوها و مره لا الصف راح يصير فوضى.

بعض القوانين المقترحة :

1- رفع اليد عند الإجابه .

2- الجلوس في مكانك المحدد.

3- المحافظه على نظافة المكان .

4- احترام الأخرين .

5- المحافظه على الممتلكات العامة .

6- الإستأذن قبل الحديث .

هذي بعض القوانين المهم الي كل معلم و معلمة لازم يحرصون عليها ، ومن الاشياء الي لازم تركزون عليها أنكم تشرحون للطلبه شنو تعني هذي القوانين لأن إذا ماعرفوا معناها عدل مستحيل يطبقونها بالصوره الي تبونها .

 

نصايح معلمين !!

السلام عليكم ورحمه الله و بركاته

 

 

 

هذا فيديو حيل حلو وحبيت فكرته ، معلمين و معلمات قدم يكتبون رساله و نصايح لمعليمن و معلمات يدد ،

أتمنى ينال أعجباكم .

 

 

 

 

إيطارات

السلام عليكم ورحمه الله وبركاته

هذي بعض الإيطارات الي ممكن تستفيدون منها سواء بالتحضير أو أوراق العمل أتمنى تنال على إعجابكم

 

أتمنى إنها عجبتكم ^_^