موقع Kahoot

بسم الله الرحمن الرحيم

 

اليوم بإذن الله راح أتكلم عن موقع يديد و مفيد و مسلي ، الموقع أسمه kahoot طريقه التسجيل بالموقع جدا بسيطه راح أعرض الطريقة بالصور و راح أتكلم عن مميزات الموقع و الهدف منه .

 

طريقة التسجيل

 

1- عن طريق google ، نكتب بالبحث kahoot ، بعد مانحصل الموقع و ندش راح نبدي التسجيل .

     أ- نختار أمر تسجيل  sign up .

 

 

 

     ب- بعدين راح نختار أنا معلم ، و نعبي البيانات المطلوبة ( أسم المستخدم - الإيميل- الرقم السري )

 

 

 

 

جـ - راح تفتح لنا الصفحة هذي و  راح أشرح طريقه عمل الكويز و الطريقه جدا مسلية و ممتعه ، أما بالنسبة للسهم الأخضر فهي مناقشات و الأزرق استبيان ، راح أتكلم عنهم عقب إن شاءالله .

 

 

د- بعد ما نختار الquiz أول شي نختار أسم له .

 

  هـ - الحين نكتب السؤال عند السهم الأحمر ، ممكن نضيف صور أو فيديو و أخر شي تحت نكتب الإجابات و نحدد الإجابة الصحيحة و ممكن تكون واحده أو ثنتين أو ثلاث ، و أخر شي نحفظ واستمرار.

 

 

 

و - بهالخطوه راح نختار لغه الاختبار و إذا نبي خاص أو عام و حق أي فئه ( الفئه المستهدفة ) ، و ممكن نكتب وصف . 

 

 

ز- الخطوه الأخيرة نقدر نحطه صوره غلاف حق الإختبار .

 

 

و بجذي سوينا اختبار و باقي بس طريقه اللعب ، نعطي الطلبة الكود الي بالصوره و كل طالب يدش من جهازه سواء لاب توب أو أيباد ايبود أو أيفون عادي و تبتدي اللعبة و أخر شي تطلع النتيجة و مركز كل واحد .

 

 

 

 

 

 

 

هذا الموقع باختصار و يارب يكون الشرح واضح و بسيط و أتمنالكم التوفيق .

 

 

بداية جديدة

بسم الله الرحمن الرحيم

كل عام و انتو بخير جميعاً إن شاء الله تكون سنه خير و إنجازات للجميع ... اليوم حابه أتكلم عن موضوع مهم للجميع خصوصاً المعلمين و المعلمات اليدد ... أكيد الكل تقريبا حطولهم أهداف يديده للسنة اليديدة في أشخاص حطو الأهداف بذهنهم و أشخاص كتبوا الي يبونة بورقة و في الي حط الهدف جدام عينة بالدار بالسيارة بالدوام و غيره ... لكن ! هل قاعد نحقق كل هالأهداف هل قاعد ننجزها كلها أو إنها عاده كل سنه لازم نسويها ؟ ... هالنقطة وايد مهم هل الإنجاز و قيمة الإنسان لذاته تكون بكثرة الأهداف الي يكتبها ؟ ... طبعا لا ... كل شخص قاعد يتعب على نفسه و قاعد يجتهد و يحاول ينميها و يطبق الي تعلمة يستحق أن يحترم ذاته لا نقييم أنفسنا على كثرت الأهداف الي نكتبها ... لازم يكون التقييم بكثر الإنجازات و لو كانت بسيطة ... أول شي نبدي بنفسنا نتعلم نحترم ذاتنا و نقدرها و ماننطر التقييم و التقدير الخارجي إن وجدا فمرحبا به و إن لم يوجد فأهلا بتقديري لذاتي ... محد يعرف الشخص كثر ذاته ... فليش ننطر التقدير الخارجي ... الشخص الي مايعرفك ما يقدرك مثل مايقولون فإذا انت ماعرفت نفسك شلون تبي الأشخاص الثانيين يعرفونك و يقدرونك إذا ماقدرت ذاتك شلون تبي الأخرين يقدرونك ... صدقوني الإنسان إذا عرف قدره بنفسه راح يستغني عن تقدير الناس له ... والحين بعد ما تعلمنا شلون نقدر ذاتنا كونا معلمين و معلمات لازم ننقل هالشي حق الطلبه فدور المعلم مايكمن في كونه معلم للماده الدراسيه الي يعلمها إنما يمتد لي التعلم النفسي و السلوكي و الاجتماعي للطالب ... فالتربيه تسبق التعليم ... تخيلوا معاي شنو بتكون صورة المعلم الي زرع قيم تربويه بالطالب قبل المعلومات العلميه  بعد سنوات و بعد مايتخرج الطالب و يتماشى مع هالقيم الي قد ما يكتسبها من البيت لأي سبب كان ... فبعض الطلبة أيتام و البعض الأخر من أسر مفككة و البعض من أسر الأب و الأم مطلقين و البعض يعيش في أسر عنيفة ... أحنا قد نجهل الوسط الي يعيش في الطالب لكن بإمكانا كمعلمين و معلمات أن نساعد هالطلبه إنهم يكونون شخصياتهم و يطورون من أنفسهم و يقدرون ذاتهم  من عمر صغير من خلال هالقيم التربوية من تقدير و إحترام للذات و تحديد الأهداف ... فأتمنى مع بداية سنة يديدة و أهداف يديدة أن يكون هدفنا الأول مهنيا التركيز على الطلبة من الناحية  التربوية أكثر من التركيز على المحتوى العلمي ( لا أعني إهمال المادة ) لأن الطالب إذا حس بإهتمام المعلم في لا شعور بحب المادة و يركز عليها ^_^ .

 

أعتذر عالإطالة و لكن حبيت أشاركم هالموضوع و يارب يكون خفيف عليكم و إن شاء الله رسالتي وصلت